စိတ်လေးလံနေတယ်

Views

 

မြန်မာနိုင်ငံက နိုင်ငံကြီးတွေရဲ့ကစားကွင်း ဖြစ်လာနေလို့ စိုးရိမ်တယ်။

-

တိုင်းရင်းသားလက်နက်ကိုင်တွေက လက်နက်ကိုင်ကြိုးပမ်းမှုတွေ အရှိန်ပြင်းထန်လာပြီး ကိုယ်ပိုင်အုပ်ချုပ်ရေး ရရှိဖို့ကို တောင်းဆိုတာတွေ ရဲရဲတင်းတင်း လုပ်လာတယ်။ ဒါကြောင့် စိတ်ထဲမှာ အလွန်လေးလံနေတယ်။

-

အဲ့ဒါ ထိုင်းနိုင်ငံ ဒုတိယဝန်ကြီးချုပ် ပြောတာ။

 

" အခုအချိန်မှာ အစ္စရေးနဲ့ ဂါဇာကိစ္စတို့အပြင် ယူကရိန်းအရေးကို အားလုံးက စိတ်ဝင်စားနေတယ်ဆိုတာ သိပါတယ်။ ဒါပေမဲ့ အရှေ့တောင်အာရှဖြစ်တဲ့ ကျွန်တော်တို့ရဲ့ ဒေသအတွက် မြန်မာနိုင်ငံအရေးဟာ အာဆီယံ အဖွဲ့ဝင်နိုင်ငံတွေ စိတ်ထဲမှာ အထူးသဖြင့် မြန်မာနဲ့ကပ်နေတဲ့ ထိုင်းရဲ့စိတ်ထဲမှာ အလွန်ပဲ လေးလံနေပါတယ်လို့ " ဒါးဗို့စ် ကမ္ဘာ့စီးပွားရေးဖိုရမ်မှာ ထိုင်းဒုတိယဝန်ကြီးချုပ် ပန်ပရီးနာ ဟစ်ဒါနူခါရ က ဇန်နဝါရီလ ၁၆ ရက်နေ့မှာ Bangkok post သတင်းစာကို ပြောခဲ့တယ်။

-

သူကဆက်ပြီး " ဒေသတွင်းနိုင်ငံတွေ စိုးရိမ်တာကတော့ မြန်မာနိုင်ငံဟာ အစိတ်စိတ်အမြွာမြွာဖြစ်မှု တိုးလာနေပြီး အင်အားကြီးနိုင်ငံတွေရဲ့ ပြိုင်ပွဲအတွက် ကစားကွင်းဖြစ်လာနေတာပဲဖြစ်ပါတယ်" လို့ ပြောခဲ့တယ်။

-

မြန်မာနိုင်ငံအကြောင်း မြန်မာတွေကလွဲရင် အကုန်သိနေကြတယ်။

-

မြန်မာနိုင်ငံထဲမှာ ဖြစ်နေတာတွေကို မြန်မာနိုင်ငံထဲက လူအများစုက ဒီမိုကရေစီအရေး၊ ဖက်ဒရယ်အရေး၊ မဲမသမာမှုကြောင့် အာဏာထိမ်းလိုက်လို့ ဖြစ်လာတဲ့အရေးလို့သာ သိထားကြပေမယ့် ပိုမြင်နိုင်တဲ့သူတွေက အမေရိကန်နဲ့ တရုတ် ကစားနေတယ်ဆိုတာကို သိကြတယ်။

-

ပြည်ပရောက် အစိုးရဆိုတဲ့သူတွေကို အမေရိကန်က ထောက်ပံ့လို့ မြောက်ပိုင်းလက်နက်ကိုင်တွေကို တရုတ်က ထောက်ပံ့တာ။ ဒါ ရိုးရိုးရှင်းရှင်းလေးပါ။

-

အဲ့လိုဆိုတာကို အထောက်အပံ့ရနေတဲ့ ကာယကံရှင်အဖွဲ့တွေ ကိုယ်တိုင်မသိဘူး။ ငါတို့မှန်လို့ ငါတို့ကို ထောက်ခံနေကြတာလို့ ထင်နေကြတယ်။

-

ဘယ်လောက်မှန်မှန် ဘယ်လောက်မှားမှား တရုတ်ကို ဆန့်ကျင်ရင် အမေရိကန် ထောက်ပံ့မယ်။ ဘယ်လောက်မှန်မှန် ဘယ်လောက်မှားမှား အမေရိကန် အကျိုးယုတ်စေရင် တရုတ်ထောက်ပံ့မယ်။ ဒါ ရိုးရှင်းတဲ့ နိုင်ငံရေး ဖြစ်ပါတယ်။

-

အမေရိကန်နဲ့ တရုတ်တို့အပြိုင် မြန်မာနိုင်ငံထဲ ခြေကုတ်ယူတာ မြန်မာနိုင်ငံထဲက လူတွေမသိဘဲ သူတို့ပုံဖော် နေတဲ့အတိုင်း လိုက်လုပ်ရင် ဘာဖြစ်သွားမလဲ လက်နက်ကိုင်တွေကော ပြည်ပရောက်အစိုးရဆိုသူတွေကော မသိကြဘူး။

-

မြန်မာနိုင်ငံ ပြိုကွဲသွားမှာပါ။

-

အခုကို ရှမ်းပြည်မြောက်ပိုင်းနဲ့ သံလွင်မြစ်အရှေ့ပိုင်း မြန်မာအစိုးရ အာဏာမသက်ရောက်တော့ဘူး။ ရှမ်းမြောက်က ကုန်သွယ်ရေးလမ်းကြောင်းလည်း ပိတ်သွားပြီး ရှမ်းတောင်ပိုင်း ကျိုင်းတုံဖက်ကို ဦးတည် သွားပြီ။

-

ကျန်တဲ့ မြန်မာနိုင်ငံတောင်ပိုင်းကို အမေရိကန်လက်ဝေခံတွေနဲ့ ထိမ်းချုပ်ထားနိုင်ဖို့ ဆက်လုပ်လိမ့်မယ်။ မထိမ်းချုပ်နိုင်သရွေ့ မတည်ငြိမ်အောင် လုပ်နေလိမ့်မယ်။

-

ခုလောက်ဆို ရှမ်းပြည်မြောက်ပိုင်းစစ်က ဒီမိုကရေစီ၊ တော်လှန်ရေး ဆိုတာတွေနဲ့ ဘာမှမဆိုင်ဘူးဆိုတာ သိနိုင်ကြပြီလို့ ထင်ပါတယ်။ ပြည်ပရောက်အစိုးရဆိုသူတွေက အတင်းပတ်သက်တယ်ဆိုတာဖြစ်အောင်လုပ် ( ဆွဲစိ ) နေကြပေမယ့် မြောက်သုံးဖွဲ့ကော၊ ဝ ကော၊ မိုင်းလားကော စကားထဲတောင် ထည့်မပြောကြဘူး။

-

ယူကရိန်းမှာ အမေရိကန် နေတိုးအဖွဲ့နဲ့ ရုရှားစစ်ဖြစ်နေတာဆိုတာကို နားလည်တဲ့သူတွေ သိတယ်။ ဇလင်စကီး က ခိုင်းတာလုပ်ရတဲ့ ကြိုးဆွဲအရုပ်ပါ။ ယူကရိန်းနိုင်ငံတော့ ပျက်စီးသွားပြီ။ ယူကရိန်းက အဆိုတော်တစ်ယောက်က ယူကရိန်းမှာ ဘာအနာဂါတ်မှ မရှိတော့ဘူးလို့ ပြောသွားတယ်။

-

မြန်မာနိုင်ငံလည်း အမေရိကန်နဲ့ တရုတ် နယ်မြေလုစစ်ဖြစ်နေတာဆိုတာ နားလည်တဲ့သူတွေ သိတယ်။ မြန်မာနိုင်ငံမှာလည်း ဇလင်စကီးလိုတွေ ရှိတယ်။ အမေရိကန် က NDAA ဆိုပြီး ပိုက်ဆံနည်းနည်းပေးခိုင်း နေတာ။ မြန်မာနိုင်ငံလည်း ယူကရိန်းနီးပါး ပျက်စီးစပြုလာပြီ။ တွေးတတ်တဲ့သူတွေ မြန်မာနိုင်ငံ အနာဂါတ် နည်းနည်းပဲ ကျန်တော့တယ်ဆိုတာ ပြောနေကြပြီ။

-

လွယ်လွယ်လေးပြောနေကြတဲ့ မြန်မာနိုင်ငံက ကိုယ်ပိုင်အုပ်ချုပ်ရေးဆိုတာ နိုင်ငံကိုဖဲ့ထုတ်ပြီး တစ်စင် ထောင်တာမျိုး ဖြစ်နေတယ်။ သဘောက နိုင်ငံခွဲထွက်တဲ့ပုံ လုပ်နေကြတာ။

-

မြန်မာနိုင်ငံ ပျက်စီးလာတာ ကဏ္ဍစုံလို ဖြစ်လာပြီ။ နားမလည်တဲ့သူတွေဝင်ပါပြီး ထင်တိုင်းလုပ်နေကြလို့ နားလည်တဲ့သူတွေ စိတ်လေးနေကြရပြီ။

-

တိုင်းပြည်ပြိုကွဲလည်း အရေးမကြီးဘူး ငါတို့လုပ်ချင်တာ လုပ်မယ်ဆိုတဲ့သူတွေများလို့ ထိုင်းဒုတိယဝန်ကြီးချုပ်လို ကိုယ်တွေဆီမှာလည်း စိတ်တွေလေးလံနေကြရတဲ့ သူတွေများနေတာ အမှန်ပါ။

 

မိုးတင့်ဆွေ ( ရန်ကုန်တက္ကသိုလ် )